Ngayong Gabi
Hawiin natin ang mga ulap ngayong gabi,
At damhin ang lamig ng ihip ng hangin;
Parang panaginip na sa tadhana’y hinabi,
Bawat segundong magdaraa’y sadyang atin…
Bakas ang lungkot na iyong nadarama,
Sa gitna ng kadilimang ‘di matitinag;
Maya-maya pa’y unti-unti kang lumuha,
Hetong panyo’t ngiti mo sana’y maaninag…
Hayaan mong makinig kami ng kalangitan,
Kasama ng nagkukubling buwan sa madilim na kumot;
Ngayong oras, hindi ko maaaring hayaan,
Magpatuloy ang malamig mong puso sa pagkalungkot…
Dahil bukas ng umaga, alam kong magiging ayos na ang lahat,
Kasama mo na siyang muli’t ako’y mananaginip na muli nang nakamulat…
